Па выніках візіту ў цэнтральны офіс Беларускай універсальнай таварнай біржы (БУТБ) намесніка генеральнага дырэктара Цэнтра развіцця гандлёвай палітыкі Казахстана «QazTrade» Бауыржана Гайсы вызначаны ключавыя напрамкі ўзаемадзеяння дзвюх арганізацый у рамках пагаднення аб супрацоўніцтве, падпісанага ў лістападзе 2025 г.

Акрамя абмену інфармацыяй і правядзення сумесных навучальных мерапрыемстваў для прадстаўнікоў казахстанскай бізнес-супольнасці, бакі плануюць засяродзіць намаганні непасрэдна на пытаннях павелічэння аб'ёмаў біржавога гандлю паміж Беларуссю і Казахстанам. Пры гэтым увага будзе ўдзяляцца не толькі пастаўкам беларускіх тавараў на рынак Казахстана, але і імпарту запатрабаванай у Беларусі прадукцыі казахстанскай вытворчасці.

Паводле слоў Баўыржана Гайсы, біржавая пляцоўка адкрывае рэальныя магчымасці для казахстанскіх кампаній як па закупцы, так і рэалізацыі тавараў у Беларусі, істотна спрашчаючы пошук дзелавых партнёраў і зніжаючы рызыкі, звязаныя са знешнегандлёвай дзейнасцю.

«Пазнаёміўшыся з прынцыпамі працы, асаблівасцямі і перавагамі беларускай біржавой платформы, магу з поўнай упэўненасцю сказаць, што гэты інструмент стане добрай падмогай у рашэнні нашай агульнай задачы па павелічэнні ўзаемнага тавараабароту. Ферасплавы, зерне, баваўнянае валакно, сланечнікавы алей – усё гэта мы гатовыя пастаўляць у Беларусь праз біржу. У той жа час нам цікавы і імпарт з вашай краіны. У першую чаргу гэта такія тавары, як сухое малако, сметанковае масла, мяса, прадукцыя дрэваапрацоўкі. Біржа зручная тым, што тут усё сканцэнтравана – попыт і прапанова, імпарт і экспарт, сыравіна і гатовыя вырабы. Таму лічу, што скаардынаваная праца нашых арганізацый па рэалізацыі пагаднення аб супрацоўніцтве абавязкова паслужыць далейшаму ўмацаванню гандлёва-эканамічных адносін Казахстана і Беларусі», – падкрэсліў намеснік генеральнага дырэктара QazTrade.

У 2025 г. сума біржавых здзелак, заключаных на БУТБ рэзідэнтамі Рэспублікі Казахстан, павялічылася ў 1,5 раза, да больш чым 43 млн USD. Галоўным драйверам росту стаў экспарт беларускай сельгаспрадукцыі, на які прыпала 96% біржавога тавараабароту дзвюх краін. Лідэрамі продажаў былі сухое малако, сметанковае масла, цукар, прадукцыя з ялавічыны і піламатэрыялы.

У мінулым годзе таксама прыкметна пашырыўся пул казахстанскіх удзельнікаў біржавых таргоў – са 146 да 201.