Беларуская ўніверсальная таварная біржа (БУТБ) і Інданезійская біржа тавараў і дэрыватываў (Indonesia Commodity & Derivatives Exchange, ICDX) падпісалі мемарандум аб супрацоўніцтве па развіцці біржавога гандлю паміж Беларуссю і Інданезіяй. Цырымонія адбылася ў рамках Інданезійска-Беларускага бізнес-форуму, які прайшоў 30 чэрвеня ў Джакарце.

Дакументам прадугледжана ўзаемадзеянне бакоў па шэрагу ключавых напрамкаў, якія адпавядаюць інтарэсам Беларусі і Інданезіі. БУТБ і ICDX, у прыватнасці, плануюць сумесна прапрацоўваць перспектыўныя таварныя пазіцыі для рэалізацыі на біржавых таргах, садзейнічаць прыходу інданезійскіх кампаній на электронную платформу БУТБ, абменьвацца вопытам і праводзіць кансультацыі па пытаннях фарміравання арганізаванага таварнага рынку, а таксама дзяліцца аналітычнымі і маркетынгавымі матэрыяламі.

«Падпісанне мемарандума - важны крок на шляху да выбудоўвання ўстойлівай, празрыстай і ўзаемавыгаднай сістэмы трансгранічнага гандлю паміж нашымі краінамі. Кансалідацыя намаганняў дзвюх біржаў спросціць выхад беларускіх экспарцёраў на перспектыўны рынак Інданезіі і адначасова адкрые інданезійскім таваравытворцам доступ да патэнцыйных спажыўцоў у Беларусі. Для БУТБ міжбіржавае супрацоўніцтва - адзін з безумоўных прыярытэтаў, паколькі менавіта праз такія партнёрствы мы фарміруем новыя каналы збыту, зніжаем транзакцыйныя бар'еры і ўмацоўваем гандлёва-эканамічныя адносіны на доўгатэрміновую перспектыву», – заявіў памочнік старшыні праўлення БУТБ Аляксандр Башлій, які прадстаўляў біржу на бізнес-форуме.

Са свайго боку дырэктар ICDX Трайдан Патрык Дамінік Сірыл Міранда акцэнтаваў увагу на практычным характары супрацоўніцтва з БУТБ, якое, на яго думку, забяспечыць спрыяльныя ўмовы для павелічэння тавараабароту Беларусі і Інданезіі.

«Каштоўнасць узаемадзеяння з беларускай біржай заключаецца перш за ўсё ў яго практычнай карысці для бізнесу дзвюх краін. Нашы пляцоўкі маюць унікальны вопыт і экспертызу ў галіне біржавога гандлю, таму аб'яднанне нашых рэсурсаў і магчымасцей будзе садзейнічаць больш эфектыўнаму вырашэнню задач, актуальных для інданезійскіх і беларускіх кампаній.», – падкрэсліў топ-менеджэр інданезійскай біржы.

На сённяшні дзень для ўдзелу ў біржавых таргах на БУТБ акрэдытаваны 2 рэзідэнты Рэспублікі Інданезія, а першыя здзелкі былі заключаны ў чэрвені 2026 г. Гэта была закупка беларускага сухога абястлушчанага малака і сметанковага масла на агульную суму 1,8 млн USD.