Па выніках сустрэчы Міністра гандлю і інвестыцый Пасольства Ісламскай Рэспублікі Пакістан у Маскве сп. Шауката Хаята Чымы з кіраўніцтвам Беларускай універсальнай таварнай біржы (БУТБ) вызначаны прыярытэтныя напрамкі супрацоўніцтва, за кошт якіх плануецца актывізаваць біржавы гандаль Рэспублікі Беларусь не толькі з Пакістанам, але і з іншымі краінамі Паўднёвай Азіі. У прыватнасці, бакі збіраюцца наладзіць узаемадзеянне ў сферы лагістыкі, што дасць магчымасць аптымізаваць транспартныя выдаткі і зрабіць прадукцыю, якая рэалізуецца беларускімі ўдзельнікамі біржавых таргоў, больш прывабнай па цане для пакістанскіх пакупнікоў.

«Мы падтрымліваем цесныя кантакты з транспартна-лагістычнымі кампаніямі, якія спецыялізуюцца на дастаўцы грузаў з Расіі ў Пакістан і назад. Як правіла, прымяняюцца мультымадальныя перавозкі з выкарыстаннем марскога, чыгуначнага і аўтатранспарту, аднак зусім нядаўна быў запушчаны сухапутны маршрут праз Афганістан. Я думаю, што беларускія экспарцёры, якія працуюць на біржавой пляцоўцы, таксама маглі б ім скарыстацца. Усё ж такі лагістычны складнік сур'ёзна ўплывае на канчатковую цану тавару, таму магчыма, што з'яўленне больш зручнага спосабу дастаўкі набытай на біржы прадукцыі не толькі надасць новы імпульс пакістанска-беларускаму біржавому гандлю, але і дапаможа прыцягнуць удзельнікаў таргоў з іншых паўднёваазіяцкіх дзяржаў», – адзначыў прадстаўнік пакістанскай дыпмісіі ў Маскве.

У ходзе перамоваў былі таксама абазначаны перспектыўныя тавары беларускай і пакістанскай вытворчасці, якімі мэтазгодна гандляваць праз электронную платформу БУТБ. Для Пакістана гэта імпарт піламатэрыялаў, сухога малака, цукру і алею, а для Беларусі – закупка рысу, збожжавых, пражы і каляровых металаў. Пры гэтым, паводле слоў намесніка старшыні праўлення БУТБ Ірыны Наркевіч, прымяненне біржавога механізму спросціць выхад пакістанскіх кампаній на беларускі рынак, забяспечыўшы прамы доступ да патэнцыйных дзелавых партнёраў.

«Сутнасць біржы заключаецца ў стварэнні спрыяльных умоў для гандлю, што прадугледжвае шырокі асартымент тавараў, высокую канцэнтрацыю попыту і прапановы і кантроль выканання здзелак. Усё гэта мы гатовы прадаставіць кожнай пакістанскай кампаніі, якая вырашыць весці бізнес на нашай пляцоўцы. Аднак для эфектыўнага функцыянавання біржавога механізму неабходна масавасць, патрэбен эфект маштабу, таму ў рамках нашага ўзаемадзеяння з Пасольствам прапаную засяродзіць увагу на павелічэнні колькасці акрэдытаваных кампаній з Пакістана. Гэта мэта нумар адзін, і яе дасягненне адпавядае ўзаемным інтарэсам нашых краін», – падкрэсліла Ірына Наркевіч.