У параўнанні са студзенем-сакавіком 2022 г. сума здзелак, заключаных кампаніямі са Свярдлоўскай вобласці на Беларускай універсальнай таварнай біржы (БУТБ), вырасла амаль у 33 разы, а колькасць удзельнікаў біржавых таргоў з гэтага рэгіёну Расіі з пачатку года павялічылася да 80.

Такую статыстыку агучыў начальнік упраўлення знешнеэканамічнай дзейнасці БУТБ Аляксандр Башлій у ходзе сустрэчы з дзелавымі коламі Свярдлоўскай вобласці, арганізаванай на базе Гандлёвага прадстаўніцтва Расійскай Федэрацыі ў Рэспубліцы Беларусь 29 сакавіка 2023 г.

Паводле слоў прадстаўніка БУТБ, высокая станоўчая дынаміка біржавога тавараабароту абумоўлена актывізацыяй узаемадзеяння з малым і сярэднім бізнесам Свярдлоўскай вобласці, у тым ліку пры садзейнічанні рэгіянальнага цэнтра падтрымкі экспарту. Гэта дазволіла не толькі прыцягнуць на таргі новых удзельнікаў, але і пашырыць асартымент свярдлоўскіх тавараў, прадстаўленых на беларускай біржавой пляцоўцы.

«Калі паглядзець на структуру здзелак за мінулы год, то са Свярдлоўскай вобласці ў Беларусь у асноўным пастаўляўся чорны і каляровы металапракат – трубы, пруткі, кругі, ліставая сталь, а таксама кабельна-правадніковыя вырабы. Аб'ёмы продажаў былі невялікімі, таму была праведзена кропкавая работа з шэрагам экспартна арыентаваных прадпрыемстваў рэгіёну, уключаючы тых, што ўжо акрэдытаваны на біржы. Як вынік, цяпер назіраецца паступовае пашырэнне таварнай наменклатуры, прычым не толькі ў сегменце металапрадукцыі. У прыватнасці, у гэтым годзе суб'екты гаспадарання Свярдлоўскай вобласці ўпершыню скарысталіся біржавой пляцоўкай імпартазамяшчэння, рэалізаваўшы пробную партыю рукавоў высокага ціску», – паведаміў Аляксандр Башлій.

Тым не менш, на думку начальніка ЗЭД БУТБ, патэнцыял біржавой гандлёвай платформы пакуль задзейнічаны толькі часткова, паколькі здзелкі паміж свярдлоўскімі і беларускімі кампаніямі абмяжоўваюцца імпартам тавараў у Рэспубліку Беларусь.

«Атрымліваецца, што зараз адсутнічае ўзаемнасць паставак і таварны паток накіраваны выключна ў бок Беларусі, а прадукцыю нашых прадпрыемстваў свярдлоўскія кампаніі не купляюць. Разам з тым у Свярдлоўскай вобласці ёсць значная цікавасць да беларускай малочнай прадукцыі, палімерных вырабаў, тэкстылю, абліцовачных матэрыялаў. Усе гэтыя пазіцыі прадстаўлены на біржавых таргах і могуць пастаўляцца ў ваш рэгіён. З нашага боку будзе аказана ўсё неабходнае садзейнічанне – ад дапамогі з акрэдытацыяй да кантролю выканання здзелак», – падкрэсліў Аляксандр Башлій.