З мэтай актывізацыі супрацоўніцтва паміж Рэспублікай Беларусь і Самарскай вобласцю Расійскай Федэрацыі ў сферы электроннага біржавога гандлю і імпартазамяшчэння Рэгіянальны цэнтр развіцця прадпрымальніцтва Самарскай вобласці акрэдытаваўся на Беларускай універсальнай таварнай біржы (БУТБ). На пачатковым этапе прадстаўнік Цэнтра будзе ўдзельнічаць у таргах выключна ў якасці назіральніка, не размяшчаючы заяўкі і не заключаючы здзелкі. Гэта дасць магчымасць дэталёва вывучыць біржавы таварны рынак Рэспублікі Беларусь, вызначыць перспектыўныя напрамкі для развіцця ўзаемнага гандлю, а таксама мець пастаянны доступ да актуальнай інфармацыі аб цэнах на беларускія тавары, запатрабаваныя ў Самарскай вобласці. 

«Не сакрэт, што многія замежныя кампаніі, у тым ліку з Расійскай Федэрацыі, выкарыстоўваюць біржу не толькі як пляцоўку для заключэння здзелак, але і як маркетынгавы інструмент. Удзел у таргах дае ім магчымасць сачыць за дынамікай біржавых цэн, аналізаваць попыт і прапанову, знаходзіць новых дзелавых партнёраў. У гэтым кантэксце акрэдытацыя Цэнтра развіцця прадпрымальніцтва Самарскай вобласці ў якасці наведвальніка таргоў - гэта першы практычны крок па ўцягванні ў біржавы гандаль суб'ектаў малога і сярэдняга бізнесу з дадзенага рэгіёну Расіі. Акрамя інфармавання прадстаўнікоў самарскага бізнесу аб цікавых заяўках на куплю і продаж, якія размяшчаюцца на беларускай гандлёвай платформе, спецыялісты Цэнтра будуць таксама садзейнічаць самарскім кампаніям па выхаду на біржавы таварны рынак Рэспублікі Беларусь як для закупкі неабходных ім тавараў, так і рэалізацыі прадукцыі ўласнай вытворчасці. Гэта значыць, па сутнасці, Цэнтр развіцця прадпрымальніцтва Самарскай вобласці будзе часткова выконваць функцыі біржавога брокера, але без права заключэння здзелак ад імя сваіх кліентаў. У сувязі з гэтым спадзяемся, што наступным этапам узаемадзеяння Цэнтра з біржай стане атрыманне брокерскага сертыфіката. У гэтым выпадку можна будзе чакаць істотнага прытоку ўдзельнікаў таргоў з Самарскай вобласці і прапарцыйнага павелічэння біржавога таваразвароту гэтага рэгіёна з Рэспублікай Беларусь», – паведамілі ў прэс-службе БУТБ.