11 студзеня 2022 г. прадстаўнікі Беларускай універсальнай таварнай біржы (БУТБ) прынялі ўдзел у семінары «Рэферэндум 2022: унясенне змяненняў у Асноўны Закон», які адбыўся на базе Міністэрства антыманапольнага рэгулявання і гандлю Рэспублікі Беларусь (МАРГ) і Міністэрства спорту і турызму Рэспублікі Беларусь. Мерапрыемства арганізавана па ініцыятыве пярвічных прафсаюзных арганізацый МАРГ і Мінспорту пры садзейнічанні Рэспубліканскага камітэта Беларускага прафесійнага саюза работнікаў гандлю, спажывецкай кааперацыі і прадпрымальніцтва.

З прывітальным словам перад членамі прафсаюза двух ведамстваў, БУТБ і прадстаўнікоў дзелавых колаў выступіла старшыня Беларускага прафесійнага саюза работнікаў гандлю, спажывецкай кааперацыі і прадпрымальніцтва Аксана Герашчанка, а асноўнымі дакладчыкамі сталі старшыня праўлення Беларускага таварыства «Веды» Вадзім Гігін і беларускі палітычны аглядальнік, член камісіі па выпрацоўцы паправак да Канстытуцыі, дырэктар цэнтра «Актуальная канцэпцыя» Аляксандр Шпакоўскі.

У рамках выступлення Вадзіма Гігіна да ўдзельнікаў мерапрыемства даведзена інфармацыя аб бягучай сацыяльна-палітычнай абстаноўцы ў Рэспубліцы Беларусь і за яе межамі, прычынах, якія абумовілі неабходнасць унясення змяненняў у Асноўны Закон краіны, і важнасці актыўнага ўдзелу грамадзян у абмеркаванні прапанаваных навацый.

У сваю чаргу Аляксандр Шпакоўскі падрабязна спыніўся на змесце праекта змяненняў і дапаўненняў Канстытуцыі Рэспублікі Беларусь, растлумачыў сутнасць ключавых новаўвядзенняў і адказаў на пытанні прысутных.

Нагадаем, што 27 снежня 2021 г. на ўсенароднае абмеркаванне вынесены праект змен і дапаўненняў Канстытуцыі Рэспублікі Беларусь. Азнаёміцца з дакументам можна па наступнай спасылцы.