ЗАТ «Мяса-малочная кампанія», афіцыйны экспарцёр Міністэрства сельскай гаспадаркі і харчавання Рэспублікі Беларусь, стала новым брокерам Беларускай універсальнай таварнай біржы (БУТБ). Створаная па рашэнню Урада ў 2009 г., Мяса-малочная кампанія спецыялізуецца на экспарце прадукцыі харчовай прамысловасці, якая выпускаецца айчыннымі прадпрыемствамі мясамалочнай галіны. У статусе брокера кампанія плануе не толькі прыцягваць на біржавую пляцоўку прадаўцоў і пакупнікоў малака, сыроў, тварагу, мяса буйной рагатай жывёлы і птушкі, але і аказваць паслугі ў сферы лагістыкі і кантролю якасці.

Як адзначыў кіраўнік ЗАТ «Мяса-малочная кампанія» Павел Стайнаў, аб'яднанне намаганняў з БУТБ дасць магчымасць забяспечыць больш эфектыўную работу беларускіх сельгасарганізацый на рынках краін блізкага і далёкага замежжа і будзе садзейнічаць пашырэнню геаграфіі продажаў.

«Па сутнасці, наша кампанія прадстаўляе інтарэсы ўсіх беларускіх экспарцёраў мясамалочнай прадукцыі, таму прыярытэтнае значэнне для нас маюць як фізічныя аб'ёмы экспарту, так і магчымасці для яго дыверсіфікацыі. У партнёрстве з біржай мы разлічваем выканаць абедзве гэтыя задачы. Напрыклад, нам вельмі цікавы рынак Кітая, дзе высокім попытам карыстаецца сухое малако і ялавічына беларускай вытворчасці. Да таго ж у мінулым годзе біржавы гандаль паміж Рэспублікай Беларусь і КНР актыўна развіваўся, таму будзем старацца ўнесці свой уклад ва ўзмацненне гэтага станоўчага трэнду. Зразумела, не пакінем без увагі і іншыя краіны Азіі, а таксама Блізкаўсходні рэгіён. Гэтыя напрамкі з вялікім экспартным патэнцыялам, які нам сумесна з біржай трэба раскрыць. Што да кароткатэрміновай перспектывы, то пакуль асноўным рынкам для нас будзе Расійская Федэрацыя, тым больш што там у нас ужо ёсць шырокая сетка партнёраў, гатовых купляць беларускія тавары, у тым ліку праз біржу», – падкрэсліў Павел Стайнаў.