1 чэрвеня 2022 г. у цэнтральным офісе Беларускай універсальнай таварнай біржы (БУТБ) адбыўся навучальны семінар для слухачоў Інстытута дзяржаўнай службы Акадэміі кіравання пры Прэзідэнце Рэспублікі Беларусь.

Галоўнай мэтай мерапрыемства, арганізаванага ў рамках пагаднення аб супрацоўніцтве паміж БУТБ і Акадэміяй кіравання, стала азнаямленне кіраўнікоў вышэйшага звяна, якія займаюць адказныя пасады ў міністэрствах, ведамствах, выканаўчых камітэтах, канцэрнах, холдынгах і іншых структурах, з асноўнымі напрамкамі дзейнасці БУТБ, перспектыўнымі праектамі, а таксама роляй біржы ў фармаванні коштаў на рэсурсы і забеспячэнні эфектыўнага экспарту гатовай прадукцыі.

Для зручнасці ўдзельнікаў праграма семінара была разбіта на некалькі інфармацыйных блокаў, прысвечаных экспартным магчымасцям БУТБ і міжнароднаму супрацоўніцтву, працэдуры акрэдытацыі кампаній-нерэзідэнтаў, асаблівасцям работы пляцоўкі імпартазамяшчэння, таргам сельгаспрадукцыяй на экспарт і рэалізацыі металавырабаў на ўнутраным рынку. Пры гэтым слухачы Інстытута дзяржслужбы задавалі пытанні спецыялістам біржы, дзяліліся ўласным вопытам прымянення біржавога механізма і ў цэлым актыўна ўдзельнічалі ў дыскусіі.

Акрамя прэзентацый, для ўдзельнікаў семінара была таксама праведзена экскурсія па цэнтральным офісе БУТБ з дэманстрацыяй таргоў у «біржавой яме» і наведваннем адзінага ў Беларусі музея гісторыі біржавога гандлю.