China Township Enterprise Co., Ltd. (CTEC) стала 100-м прадпрыемствам з Кітайскай Народнай Рэспублікі, акрэдытаваным для ўдзелу ў таргах на Беларускай універсальнай таварнай біржы (БУТБ). На пачатковым этапе кампанія мае намер выкарыстоўваць біржавую пляцоўку для набыцця прадукцыі дрэваапрацоўкі, на долю якой прыпадае амаль 90% экспарту беларускіх тавараў у Кітай праз БУТБ.

«Па выніках экспартных біржавых таргоў у студзені-верасні 2022 г. на кітайскі рынак рэалізаваны беларускія тавары на суму 27 млн USD, пры гэтым больш за 24 млн USD забяспечылі піламатэрыялы – у асноўным абразная дошка з іглічных парод драўніны. У Кітаі наша пілапрадукцыя шырока выкарыстоўваецца ў будаўнічай галіне і для вырабу драўлянай тары, аднак у сувязі з запаволеннем тэмпаў росту эканомікі КНР у апошнія месяцы назіралася некаторае зніжэнне попыту. Зараз сітуацыя паступова выраўноўваецца, што станоўча ўплывае на актыўнасць кітайскіх пакупнікоў. Таму з 26 кастрычніка плануецца аднавіць практыку правядзення спецыяльных гандлёвых сесій па рэалізацыі піламатэрыялаў у Кітай з дастаўкай у кантэйнерах да пункта прызначэння. Падведамныя прадпрыемствы Мінлясгаса ўжо выставілі на таргі каля 8 тысяч кубаметраў пілапрадукцыі, але, зразумела, гэта не канчатковая лічба, паколькі прыём заявак яшчэ працягваецца. Акрамя таго, аб намеры паўдзельнічаць у гандлёвай сесіі заявілі шэраг буйных прыватных дрэваапрацоўшчыкаў, а гэта яшчэ не менш як 5-7 тысяч кубаметраў. Такім чынам, разлічваем забяспечыць дастатковы аб'ём прапановы, каб зацікавіць кітайскіх пакупнікоў і прыцягнуць іх на таргі», – паведамілі ў прэс-службе біржы. 

На БУТБ таксама адзначылі, што разам з піламатэрыяламі ў бягучым годзе ў КНР ажыццяўляліся пастаўкі нерафінаванага рапсавага алею і сухога абястлушчанага малака. Агульная сума здзелак склала звыш 3 млн USD. Улічваючы, што адным з напрамкаў дзейнасці CTEC у Кітаі з'яўляецца гандаль прадукцыяй аграпрамысловага комплексу, не выключана, што ў перспектыве «юбілейная» кітайская кампанія асвоіць і гэты сегмент біржавога таварнага рынку.