Надаць стымул развіццю біржавога гандлю паміж Рэспублікай Беларусь і Пензенскай вобласцю Расійскай Федэрацыі плануецца шляхам прыцягнення на беларускую біржавую пляцоўку прадпрыемстваў малога і сярэдняга бізнесу. Аб гэтым заявіў начальнік упраўлення перспектыўных біржавых тавараў Беларускай універсальнай таварнай біржы (БУТБ) Максім Хоміч падчас сустрэчы з прадстаўнікамі Пензенскага рэгіянальнага аддзялення агульнарасійскай грамадскай арганізацыі малога і сярэдняга прадпрымальніцтва «Апора Расіі», якая адбылася ў рамках візіту дэлегацыі БУТБ у Пензенскую вобласць. У мерапрыемстве, арганізаваным пры падтрымцы Міністэрства эканамічнага развіцця і прамысловасці Пензенскай вобласці, прынялі ўдзел каля 30 кіраўнікоў вытворчых і гандлёвых арганізацый рэгіёна.

«Невялікія прыватныя кампаніі і індывідуальныя прадпрымальнікі могуць стаць галоўнай рухаючай сілай у справе развіцця біржавога гандлю паміж Беларуссю і Пензенскай вобласцю. Яны па вызначэнні больш гнуткія і мабільныя, лягчэй адаптуюцца да зменлівых умоў і, як правіла, не баяцца выкарыстоўваць новыя інструменты, якія спрашчаюць вядзенне бізнесу. Таму мы чакаем, што менавіта суб'екты малога і сярэдняга бізнэсу будуць асноўнымі карыстальнікамі біржавой гандлёвай пляцоўкі. Пра гэта сведчыць і вопыт працы з суседнімі рэгіёнамі Расіі, такімі як Варонежская, Ніжагародская, Самарская і Разанская вобласці, дзе біржавыя таргі ўжо з'яўляюцца неад'емнай часткай дзейнасці многіх кампаній як у сферы закупак, так і ў збыце гатовай прадукцыі. Такое ж плённае супрацоўніцтва хацелася б наладзіць і з дзелавымі коламі Пензенскай вобласці», – падкрэсліў Максім Хоміч.

Прэзентацыя магчымасцяў біржавога гандлю выклікала жывую цікавасць у прадстаўнікоў мясцовага бізнэсу, пры гэтым падчас B2B-перамоваў шэраг кампаній выказалі жаданне акрэдытавацца на БУТБ для ўдзелу ў таргах. Улічваючы значную долю прадукцыі АПК у структуры экспарту Пензенскай вобласці, найбольш перспектыўнымі таварамі для рэалізацыі ў Рэспубліцы Беларусь праз біржавую пляцоўку з'яўляюцца кармавыя дабаўкі, зерне, алеі і насенне алейных культур. У сваю чаргу беларускія прадпрыемствы гатовы пастаўляць у Пензенскую вобласць прадукцыю хіміі і нафтахіміі, а таксама малакапрадукты, перш за ўсё сухое малако і сыроватку.