Беларуская ўніверсальная таварная біржа (БУТБ) і кампанія China Merchants CHN-BLR Commerce and Logistics Company (CMCB), якая ўваходзіць у склад карпарацыі China Merchants Group, падпісалі мемарандум аб супрацоўніцтве. З боку БУТБ подпіс на дакуменце паставіў старшыня праўлення Аляксандр Асмалоўскі, а з боку CMCB – генеральны дырэктар г-н Чжан Чжэньюн. Цырымонія падпісання прайшла ў рэжыме відэаканферэнцсувязі. 

Згодна з мемарандумам, БУТБ і CMCB плануюць развіваць узаемадзеянне ў галіне транспартнай і гандлёвай лагістыкі, у тым ліку шляхам рэалізацыі сумесных інвестыцыйных праектаў, якія будуць садзейнічаць актывізацыі ўзаемнага гандлю Рэспублікі Беларусь і Кітайскай Народнай Рэспублікі.

Пры гэтым, на думку Аляксандра Асмалоўскага, цяпер, калі партнёрскія адносіны бакоў аформлены юрыдычна, неабходна як мага хутчэй канкрэтызаваць дасягнутыя дамоўленасці і перавесці іх у практычную плоскасць. 

«Лагістыка, безумоўна, адыгрывае ключавую ролю ў развіцці біржавога гандлю Беларусі і Кітая. Лічу, што разгалінаваная лагістычная інфраструктура і добра наладжаныя транспартныя зносіны – гэта базавая ўмова функцыянавання беларуска-кітайскага біржавога таварнага рынку. Таму толькі за кошт сінэргіі тэхналогій электроннага біржавога гандлю і шырокіх лагістычных магчымасцей вашай кампаніі мы зможам поўнасцю рэалізаваць патэнцыял двухбаковага супрацоўніцтва. У сувязі з гэтым мне хацелася б, каб падпісаны намі сёння мемарандум стаў не проста дэкларацыяй аб намерах, а юрыдычнай асновай для доўгатэрміновага стратэгічнага партнёрства, якое дазволіць нам рэальна дапамагчы беларускім і кітайскім прадпрыемствам гандляваць адно з адным, тым самым павялічваючы тавараабарот паміж нашымі краінамі і забяспечваючы ўстойлівы рост эканамічных паказчыкаў», – падкрэсліў старшыня праўлення БУТБ. 

У сваю чаргу генеральны дырэктар кітайская кампаніі г-н Чжан Чжэньюн адзначыў узаемадапаўняльны характар паслуг, якія аказваюцца CMCB і БУТБ, і выказаў упэўненасць, што саюз адной з вядучых таварных біржаў у еўрапейскім рэгіёне і такога буйнога лагістычнага аператара, як China Merchants, надасць новы імпульс развіццю гандлёва- эканамічных адносін Беларусі і КНР. 

«Улічваючы бягучую сітуацыю ў свеце, я глыбока перакананы, што, аб'яднаўшы намаганні, мы зможам прапанаваць удзельнікам рынку найлепшыя рашэнні і паслугі ў сферы лагістыкі і гандлю. Пры гэтым галоўная мэта нашага ўзаемадзеяння - звязаць кітайскія і беларускія кампаніі праз эфектыўныя транспартна-лагістычныя калідоры, якія дазволяць аператыўна і з мінімальнымі затратамі дастаўляць беларускія тавары ў Кітай, а кітайскія – у Беларусь», – заявіў кітайскі бізнесмен. 

Па выніках перагавораў, якія адбыліся пасля ўрачыстай часткі мерапрыемства, БУТБ і CMCB дамовіліся ў найбліжэйшы час правесці першае пасяджэнне сумеснай рабочай групы для складання плана канкрэтных дзеянняў, накіраваных на рэалізацыю асноўных палажэнняў мемарандума аб супрацоўніцтве.