13 кастрычніка 2021 г. у рамках адукацыйнага праекта Акадэміі кіравання пры Прэзідэнце Рэспублікі Беларусь «Школа маладых навукоўцаў “Student in science”» адбыўся азнаямленчы візіт у цэнтральны офіс Беларускай універсальнай таварнай біржы (БУТБ) групы маладых беларускіх вучоных. У склад дэлегацыі ўвайшлі студэнты дзвюх ВНУ: Акадэміі кіравання і Баранавіцкага дзяржаўнага ўніверсітэта. Галоўныя мэты мерапрыемства – папулярызацыя біржавога гандлю і павышэнне ўзроўню фінансавай пісьменнасці моладзі.

Вітаючы юных прадстаўнікоў інтэлектуальнай эліты, намеснік старшыні праўлення БУТБ Аляксей Мацавіла адзначыў значнасць біржы як элемента рынкавай эканомікі, а таксама ролю біржавой пляцоўкі ва ўмацаванні экспартнага патэнцыялу краіны і эфектыўным размеркаванні стратэгічных рэсурсаў.

У сваю чаргу начальнік упраўлення таргоў металапрадукцыяй БУТБ Яўген Бурэйка падрабязна і на канкрэтных прыкладах распавёў аб асноўных напрамках дзейнасці біржы, ключавых перавагах біржавога механізму і магчымасцях выкарыстання электронных інструментаў і рашэнняў БУТБ пры ажыццяўленні закупак і рэалізацыі тавараў, у тым ліку за мяжу.

Прэзентацыя БУТБ выклікала жывую цікавасць у маладых людзей: яны актыўна задавалі пытанні, з задавальненнем уступалі ў дыскусію і стараліся атрымаць як мага больш інфармацыі аб новай для іх сферы.

Завяршальным пунктам у праграме візіту стала экскурсія ў Музей гісторыі біржавога гандлю, створаны БУТБ у супрацоўніцтве з Нацыянальным гістарычным музеем Рэспублікі Беларусь.