Дамоўленасць аб супрацоўніцтве паміж Беларускай універсальнай таварнай біржай (БУТБ) і Цэнтрам падтрымкі экспарту Валгаградскай вобласці ў частцы прыцягнення на біржавую пляцоўку новых кампаній дасягнута па выніках візіту ў цэнтральны офіс БУТБ прадстаўнікоў адміністрацыі гэтага рэгіёну Расіі.

У прыватнасці, плануецца правядзенне сумесных анлайн і афлайн-мерапрыемстваў з мэтай інфармавання суб'ектаў гаспадарання Валгаградскай вобласці аб магчымасцях гандлю з прадпрыемствамі з Рэспублікі Беларусь і іншых краін праз БУТБ.

«На жаль, у многіх нашых прадпрымальнікаў склаўся стэрэатып, што біржавыя таргі – гэта складана, рызыкоўна і затратна. Як правіла, менавіта гэтыя асцярогі перашкаджаюць шырокаму выкарыстанню біржавых інструментаў суб'ектамі малога і сярэдняга бізнесу. Таму валгаградскім бізнесменам напэўна будзе цікава даведацца, што ўваход на беларускую біржу бясплатны, а біржавы збор спаганяецца толькі па факце здзяйснення здзелкі. Гэта значыць, што ўдзельнікі таргоў плацяць за вынік, а не за працэс. У гэтым плане беларуская пляцоўка выгадна адрозніваецца ад многіх арганізацый, якія аказваюць B2B-паслугі», – адзначыла дырэктар Цэнтра падтрымкі экспарту Валгаградскай вобласці Вікторыя Афанасава. Пры гэтым яна падкрэсліла, што аб'яднанне намаганняў з БУТБ будзе, несумненна, спрыяць усталяванню новых бізнес-кантактаў і развіццю гандлёвых адносін паміж гаспадарчымі суб'ектамі дзвюх краін.

У сваю чаргу намеснік старшыні праўлення БУТБ Аляксей Мацавіла пацвердзіў зацікаўленасць у прыходзе на біржавую пляцоўку прадстаўнікоў дзелавых колаў Валгаградскай вобласці і ў тым ліку невялікіх вытворцаў, для якіх біржа можа паслужыць асноўным каналам прасоўвання іх прадукцыі на знешнія рынкі.

«Зразумела, малы і сярэдні бізнес цікавы нам як катэгорыя удзельнікаў біржавых таргоў. Больш за тое, мы хацелі б, каб доля такіх кампаній у тавараабароце біржы пастаянна расла. У рамках вырашэння гэтай задачы ў цяперашні час прапрацоўваецца магчымасць запуску пілотнага праекта з адным з беларускіх банкаў. Галоўная мэта – прыцягнуць на біржу індывідуальных прадпрымальнікаў і невялікія прыватныя прадпрыемствы, падаўшы ім на выгадных умовах шэраг фінансавых інструментаў, уключаючы банкаўскія гарантыі, авердрафт і крэдыты на папаўненне абаротных сродкаў. Спадзяемся, што наша ініцыятыва знойдзе водгук у прадстаўнікоў бізнэсу», – заявіў Аляксей Мацавіла.