Беларуская біржавая пляцоўка можа згуляць важную ролю ў развіцці гандлёва-эканамічнага супрацоўніцтва Індыі з Беларуссю, стаўшы надзейным злучным звяном паміж індыйскімі і беларускімі кампаніямі.

Пра гэта заявіў Надзвычайны і Паўнамоцны Пасол Рэспублікі Індыя ў Рэспубліцы Беларусь г-н Алок Ранджан падчас візіту ў цэнтральны офіс Беларускай універсальная таварнай біржы (БУТБ).

На думку дыпламата, прымяненне біржавога механізму дазволіць зрабіць структуру ўзаемнага тавараабароту больш збалансаванай за кошт павелічэння аб'ёмаў рэалізацыі такіх запатрабаваных у Індыі тавараў, як піламатэрыялы, вырабы з чорных металаў і нафтахімічная прадукцыя.

«Зараз непрапарцыйна вялікую долю ў тавараабароце паміж нашымі краінамі займаюць калійныя ўгнаенні. Але ж ёсць яшчэ мноства іншых тавараў, якія беларускія вытворцы маглі б пастаўляць у Індыю, а індыйскія – у Беларусь. У першую чаргу гэта піламатэрыялы, металавырабы, нафтахімія, прадукты харчавання. Я думаю, з дапамогай біржавой пляцоўкі ў нас атрымаецца павялічыць аб'ёмы гандлю дадзенымі відамі прадукцыі. У гэтым плане біржа – сапраўды перспектыўны інструмент, пра які павінна ведаць кожная індыйская кампанія, якая плануе працаваць у Беларусі і ва Усходняй Еўропе ў цэлым», – падкрэсліў г-н Алок Ранджан.

Старшыня праўлення БУТБ Аляксандр Асмалоўскі пагадзіўся з неабходнасцю больш актыўнага інфармавання індыйскага бізнесу аб магчымасцях удзелу ў біржавых таргах і прапанаваў аб'яднаць высілкі з Пасольствам Індыі ў частцы правядзення сумесных мерапрыемстваў, накіраваных на папулярызацыю біржавога гандлю і ўсталяванне дзелавых кантактаў паміж беларускімі і індыйскімі прадпрыемствамі. Ён таксама нагадаў, што на БУТБ акрэдытаваныя больш за 3 000 кампаній з Еўрасаюза, якім было б цікава купляць тавары, вырабленыя ў Індыі.

«Калі ў нас атрымаецца наладзіць гандаль паміж беларускімі і індыйскімі кампаніямі праз біржавую пляцоўку, то, незалежна ад нашага з вамі жадання, кампаніі з Еўрасаюза абавязкова праявяць цікавасць да прапаноў індыйскіх экспарцёраў. У гэтым сэнсе паказальны прыклад Кітая. Як толькі мы пачалі сур'ёзна прапрацоўваць кітайскі рынак і выбудавалі аптымальную лагістыку, еўрапейскія кампаніі адразу ж падхапілі гэтую тэму і пачалі выкарыстоўваць нашу гандлёвую платформу для ўзаемадзеяння з прадпрыемствамі з Паднябеснай. Таму наш слоган «Будзь з намі – гандлюй з усім светам» – гэта не проста словы, а кіраўніцтва да дзеяння», – адзначыў Аляксандр Асмалоўскі.

Па выніках сустрэчы бакі дамовіліся прапрацаваць магчымасць правядзення да канца бягучага года першага беларуска-індыйскага біржавога форуму, які дазволіць пазнаёміць дзелавыя колы Індыі з ключавымі асаблівасцямі і перавагамі беларускай біржавой пляцоўкі і стане адпраўной кропкай для доўгатэрміновага і плённага супрацоўніцтва БУТБ з Пасольствам Індыі.