На Беларускай універсальнай таварнай біржы (БУТБ) заключана першая транзітная здзелка паміж рэзідэнтамі Кітайскай Народнай Рэспублікі. 14 снежня 2021 г. кампанія з Ганконга прадала кампаніі з мацерыковага Кітая партыю ялавічыны аб'ёмам 80 т. Сума здзелкі склала 354 тыс. USD. Раней падобныя здзелкі заключаліся пераважна кампаніямі з Расіі і краін Прыбалтыкі з мэтай страхавання знешнегандлёвых рызык.

«Прымяненне біржавых таргоў як механізму хэджавання – гэта знак даверу да беларускай біржавой пляцоўкі з боку прадстаўнікоў кітайскага бізнесу. Абодва ўдзельнікі транзітнай здзелкі ўжо мелі станоўчы вопыт працы праз біржу, але гэта былі кантракты з беларускімі прадпрыемствамі. Пераканаўшыся ў надзейнасці біржавога механізму, кітайскія ўдзельнікі вырашылі скарыстацца нашай гандлёвай платформай выключна для мінімізацыі рызыкі невыканання абавязацельстваў контрагентам. Па сутнасці, гэта новы этап развіцця супрацоўніцтва Беларусі і Кітая ў сферы біржавога гандлю, калі на экспарт пастаўляецца не тавар, а паслуга па забеспячэнні выканання знешнегандлёвага кантракта. Разлічваем, што гэтая пілотная здзелка паслужыць добрым прыкладам для іншых кітайскіх кампаній, і ў далейшым аб'ёмы транзітнага гандлю з удзелам рэзідэнтаў КНР будуць расці», – пракаментавалі ў прэс-службе БУТБ.

Па стане на 1 снежня 2021 г. на БУТБ былі акрэдытаваны 64 кампаніі з КНР, што ў 2 разы больш, чым у 2020 г. Праз біржу ў Кітай у асноўным пастаўляюцца піламатэрыялы, рапсавы алей і цукар, а закупляюцца сталёвыя трубы, ліставы пракат і іншыя вырабы з чорных металаў.