12 здзелак на агульную суму каля 500 тыс. USD заключаны па выніках экспартных біржавых таргоў дублёным паўфабрыката «вет-блю», якія адбыліся на Беларускай універсальнай таварнай біржы (БУТБ). Дадзеная гандлёвая сесія стала найбуйнейшай у бягучым годзе.

«Рэгулярныя сесійныя таргі дублёным паўфабрыкатам на экспарт праводзяцца на біржавой пляцоўцы з 29 красавіка. За гэты час за мяжу рэалізаваная гарбарная прадукцыя на агульную суму 5,5 млн USD. Пакуль што лідэрам па закупках з'яўляецца Польшча з сумай здзелак за 2,1 млн USD. Другое і трэцяе месцы займаюць Вялікабрытанія і Расія з сумамі здзелак 1,3 млн USD і 1 млн USD адпаведна. Акрамя гэтага, скура «вет-блю» беларускай вытворчасці пастаўляецца ў Італію, Літву і Швейцарыю, дзе ў самыя кароткія тэрміны ўдалося знайсці патэнцыйных пакупнікоў і прыцягнуць іх на таргі», – паведамілі ў прэс-службе БУТБ.

Прадстаўнікі біржы таксама падкрэслілі, што ў цэлым у верасні актыўнасць замежных пакупнікоў на біржавых таргах паўфабрыкатам «вет-блю» прыкметна павысілася. Гэта пацвярджаюць і вынікі апошняй гандлёвай сесіі.

«Цяпер практычна за кожны выстаўлены на продаж лот ідзе канкурэнтная барацьба, а ў таргах удзельнічаюць кампаніі як мінімум з 3-4 краін. Пры гэтым выкупаецца ўся прапанаваная беларускімі гарбарнымі прадпрыемствамі прадукцыя. Калі казаць пра рынкавую кан'юнктуру, то сёння гэта адназначна рынак прадаўцоў, і яны гэтым паспяхова карыстаюцца», – адзначылі ў прэс-службе БУТБ.