Перспектывы нарошчвання аб'ёмаў біржавога гандлю паміж Арабскай Рэспублікай Егіпет і Рэспублікай Беларусь сталі галоўнай тэмай перамоваў, якія адбыліся 1 чэрвеня 2021 г. у рамках візіту дэлегацыі дзелавых колаў Егіпта ў цэнтральны офіс Беларускай універсальнай таварнай біржы (БУТБ). 

Пазнаёміцца з тэорыяй і практыкай ўдзелу ў біржавых таргах і абмеркаваць магчымыя напрамкі супрацоўніцтва прыехалі топ-менеджэры егіпецкіх кампаній, якія прадстаўляюць розныя сферы бізнесу: ад сельскай гаспадаркі і лёгкай прамысловасці да будаўніцтва і энергетыкі. 

Як адзначыў кіраўнік егіпецкай дэлегацыі – Генеральны сакратар Федэрацыі егіпецкіх гандлёвых палат, Старшыня Канфедэрацыі Еўрапейска-Міжземнаморскіх і Чарнаморскіх федэрацый палат доктар Алаа Эзз, у Егіпце біржавы гандаль таварамі знаходзіцца на этапе станаўлення, таму інфармацыя, атрыманая ў ходзе наведвання БУТБ, будзе не толькі карысная егіпецкім бізнесменам, якія плануюць выходзіць на беларускі рынак, але і дапаможа пры стварэнні першай егіпецкай таварнай біржы. 

Са свайго боку старшыня праўлення БУТБ Аляксандр Асмалоўскі пацвердзіў зацікаўленасць біржы ва ўмацаванні кантактаў з егіпецкай дзелавой супольнасцю і выказаў надзею на садзейнічанне з боку Федэрацыі егіпецкіх гандлёвых палат у прыцягненні на беларускую біржавую пляцоўку кампаній з Егіпта.

«Сур'ёзна прапрацоўваць егіпецкі напрамак мы пачалі толькі ў гэтым годзе, але пэўныя поспехі ўжо ёсць. Напрыклад, у сакавіку ў нас зарэгістравана першая здзелка, заключаная кампаніяй з Егіпта. Тады была закуплена пробная партыя беларускіх піламатэрыялаў, і, наколькі нам вядома, тавар без праблем дастаўлены канчатковаму спажыўцу. Цяпер для нас важна прыцягнуць на таргі як мага больш егіпецкіх прадпрыемстваў, прычым як пакупнікоў, так і пастаўшчыкоў, каб біржавы механізм функцыянаваў максімальна эфектыўна. У сувязі з гэтым разлічваем на вашу дапамогу ў папулярызацыі інструментаў біржавога гандлю сярод прадстаўнікоў егіпецкага бізнесу», – падсумаваў Аляксандр Асмалоўскі.

Па выніках сустрэчы плануецца арганізаваць афіцыйны візіт на БУТБ кіраўніцтва Егіпецкай таварнай біржы. Акрамя таго, інфармацыя аб магчымасцях беларускай біржавой пляцоўкі будзе ўключана ў прэзентацыйныя матэрыялы, якiя распаўсюджваюцца сярод удзельнікаў дзелавых мерапрыемстваў, якія праводзяцца Федэрацыяй егіпецкіх гандлёвых палат.