Перспектывы выкарыстання механізму біржавых таргоў для арганізацыі паставак беларускай пілапрадукцыі у Францыю абмеркаваны 23 лютага ў ходзе сустрэчы кіраўніцтва Беларускай універсальнай таварнай біржы (БУТБ) і французскага імпарцёра драўніны – Bois Import SA. 

Як адзначыў прадстаўнік Bois Import Франк Ванжан, досыць доўгі час яго кампанія закупляла піламатэрыялы ў краінах Балтыі, аднак пандэмія каронавіруса ўнесла свае карэктывы, прымусіўшы шукаць альтэрнатыўныя рынкі. Адным з такіх рынкаў можа стаць Беларусь.

«Калі мы высветлілі, што значная частка піламатэрыялаў, якія трапляюць у Францыю з Прыбалтыкі, на самой справе вырабляюцца ў Беларусі, мы вырашылі дэталёва вывучыць ваш рынак і паспрабаваць купляць патрэбную нам прадукцыю непасрэдна ў вытворцаў. Біржавыя таргі – зусім новы для нас інструмент і, хутчэй за ўсё, спатрэбіцца нейкі час на тое, каб асвоіць яго. Аднак магчымасці, якія ён адкрывае, безумоўна, пераважваюць любыя нязручнасці», – лічыць французскі бізнэсмэн.

У сувязі з гэтым першы намеснік старшыні праўлення БУТБ Андрэй Новікаў запэўніў г-на Ванжана ў гатоўнасці біржы аказаць Bois Import любое неабходнае садзейнічанне па выхадзе на беларускі рынак, уключаючы акрэдытацыю, навучанне і пошук дзелавых партнёраў.

«Каля паловы ўсіх піламатэрыялаў, якія вырабляюцца ў Беларусі, рэалізуецца на экспарт праз біржавую пляцоўку, а гэта каля 2 млн куб. м у год. Больш за тое, у студзені нам удалося прыцягнуць на таргі шэраг пастаўшчыкоў пілапрадукцыі і круглага лесу з Расіі, таму, рэгіструючыся на нашай біржы, вы аўтаматычна атрымліваеце доступ і на расійскі рынак», – заявіў Андрэй Новікаў. Ён таксама прапанаваў французскаму боку не абмяжоўвацца піламатэрыяламі, а разгледзець магчымасць закупкі і іншай прадукцыі дрэваапрацоўкі, у тым ліку драўняных пелет.

«У мінулым годзе ў Беларусі былі пабудаваны і ўведзены ў эксплуатацыю 6 новых пелетных заводаў. Яшчэ 6 плануецца пабудаваць у бягучым годзе. У выніку наша краіна зможа штогод рэалізоўваць на экспарт прыкладна 250 тыс. т пелет. Так што цяпер у вас ёсць добрая магчымасць зайсці на гэты рынак на этапе станаўлення і стаць адным з першых пастаўшчыкоў беларускіх пелет у краіны Еўрасаюза. Пры гэтым рэгулярнасць паставак можна лёгка забяспечыць шляхам заключэння гадавых кантрактаў», – дадаў прадстаўнік БУТБ.