Прэзентацыя Беларускай універсальнай таварнай біржы (БУТБ) як перспектыўнай кропкі ўваходу на беларускі рынак лесапрадукцыі адбылася ў рамках міжнароднага лесапрамысловага форуму «Новыя правілы гульні: дрэваапрацоўчая прамысловасць ва ўмовах пандэміі», які адбыўся 27 мая 2021 г. у Тайцане (правінцыя Сучжоу, КНР). Арганізатарамі мерапрыемства, якое сабрала больш за 120 кітайскіх прадпрыемстваў лясной галіны, а таксама вядучых экспертаў з краін Еўропы і Азіі, выступілі LEF Network China (праект па падтрымцы экспарту еўрапейскай лесапрадукцыі ў Кітай) і кампанія Tao Wood (буйны кітайскі імпарцёр лесаматэрыялаў).

У ходзе прэзентацыі прадстаўлены экспартны патэнцыял беларускай лясной галіны, адзначаны вопыт БУТБ па арганізацыі паставак беларускіх піламатэрыялаў у Кітай па Новым Шаўковым шляху і асноўныя перавагі біржавой пляцоўкі для кітайскіх пакупнікоў. Асобная ўвага нададзена практыцы правядзення спецыяльных біржавых гандлёвых сесій, якія прадугледжваюць рэалізацыю піламатэрыялаў з дастаўкай канчатковым спажыўцам на тэрыторыі Кітая. Гэта дазволіла прыцягнуць на БУТБ шэраг буйных імпарцёраў і менш чым за паўгода ў разы павялічыць аб'ёмы экспарту беларускай лесапрадукцыі ў КНР.

Адначасова вядзецца праца па пашырэнні прымянення механізму транзітных здзелак. У прыватнасці, фарміруецца пул пастаўшчыкоў піламатэрыялаў са Смаленскай, Бранскай і Пскоўскай абласцей Расійскай Федэрацыі, зацікаўленых у рэалізацыі сваёй прадукцыі не толькі ў Беларусі, але і ў іншых краінах, уключаючы ЕС, Кітай, Вялікабрытанію, Егіпет.