Беларуская ўніверсальная таварная біржа (БУТБ) гатова прадаставіць карэльскім экспарцёрам магчымасць з мінімальнымі рызыкамі і затратамі на маркетынг пастаўляць сваю прадукцыю ў 68 краін свету. 

Аб гэтым заявіў першы намеснік старшыні праўлення БУТБ Андрэй Новікаў у ходзе прэзентацыі патэнцыялу беларускай біржавой пляцоўкі ў рамках канферэнцыі «Экспарт: трэнды і перспектывы», арганізаванай Цэнтрам падтрымкі экспарту Рэспублікі Карэлія і АТ «Расійскі экспартны цэнтр». У мерапрыемстве прынялі ўдзел каля 50 суб'ектаў малога і сярэдняга бізнесу, прадстаўнікі рэгіянальных органаў выканаўчай улады і Карэльскай мытні. 

Расказваючы пра асаблівасці выкарыстання біржавога механізму ў знешнім гандлі, Андрэй Новікаў падрабязна спыніўся на досведзе БУТБ па вывядзенні на рынак і «раскрутцы» новых таварных пазіцый. У якасці паказальнага прыкладу ён прывёў экспартныя таргі бураковым жомам і меласай, якія падаражэлі больш чым у паўтара раза пасля іх пераводу на біржавую платформу. 

«Жом і меласа – пабочныя прадукты вытворчасці цукру. Доўгі час яны не лічыліся высокаліквіднай прадукцыяй і былі, па сутнасці, недаацэнены. Біржавая пляцоўка дазволіла поўнасцю раскрыць іх экспартны патэнцыял, і цяпер з кожнай рэалізаванай тоны беларускія цукровыя заводы атрымліваюць каля 60 EUR дадатковай выручкі. Адначасова пашырылася і геаграфія продажаў. Сёлета бураковы жом і меласу беларускай вытворчасці куплялі 20 кампаній з Нідэрландаў, Расіі, Украіны і краін Прыбалтыкі. Аналагічную працу па павышэнню эфектыўнасці экспарту мы гатовы правесці і для любых тавараў, што выпускаюцца прадпрыемствамі Рэспублікі Карэлія. Пры гэтым для невялікіх прыватных кампаній біржа можа стаць не проста дадатковым каналам збыту, але і ў некаторым сэнсе нават замяніць аддзел знешнеэканамічнай дзейнасці», – падкрэсліў Андрэй Новікаў.

Праграмай канферэнцыі былі таксама прадугледжаны B2B-перамовы, падчас якіх прадстаўнікі БУТБ абмеркавалі перспектывы супрацоўніцтва з карэльскімі экспарцёрамі прадуктаў харчавання і тавараў прамысловага прызначэння. У выніку шэраг прадпрыемстваў выказалі зацікаўленасць у акрэдытацыі на біржавой пляцоўцы з мэтай рэалізацыі сваёй прадукцыі ў Рэспубліку Беларусь і краіны Еўрапейскага саюза.