Магчымасць правядзення біржавых таргоў прамысловым абсталяваннем і харчовымі таварамі вытворчасці Саратаўскай вобласці абмеркавана падчас наведвання Беларускай універсальнай таварнай біржы (БУТБ) дэлегацыяй прадстаўнікоў малога і сярэдняга бізнесу з гэтага рэгіёна Расійскай Федэрацыі. Візіт арганізаваны па ініцыятыве Цэнтра падтрымкі экспарту Саратаўскай вобласці ў рамках работы па актывізацыі гандлёва-эканамічнага супрацоўніцтва з Рэспублікай Беларусь.

З улікам складу расійскай дэлегацыі асаблівая ўвага на перагаворах была ўдзелена біржавой B2B-пляцоўцы, якая працуе па прынцыпу электроннага маркетплейсу і прызначана для рэалізацыі шырокага спектра тавараў прамысловага і спажывецкага прызначэння.

Паводле слоў начальніка ўпраўлення знешнеэканамічнай дзейнасці БУТБ Аляксандра Башлія, гэта гандлёвая платформа добра зарэкамендавала сябе як інструмент для ажыццяўлення карпаратыўных закупак і можа быць выкарыстана саратаўскімі кампаніямі для выхаду на беларускі рынак.

«На нашай B2B-пляцоўцы рэгулярна размяшчаюцца заяўкі на набыццё ад вядучых беларускіх сельскагаспадарчых і прамысловых прадпрыемстваў, банкаўскіх устаноў, будаўнічых трэстаў. Самастойна выйсці на такіх буйных кліентаў без сур'ёзных выдаткаў на маркетынг невялікаму самарскаму вытворцу практычна нерэальна, а біржавыя таргі забяспечваюць такую магчымасць. Прычым сярод замежных кампаній менавіта расіяне праяўляюць найбольшую актыўнасць, пастаўляючы ў Беларусь прадукцыю хімічнай галіны, абсталяванне, механізмы, камплектуючыя і нават нарыхтоўкі для банкаўскіх картак. Упэўнены, што і саратаўскія прадпрыемствы змогуць праз біржавую пляцоўку знайсці надзейных партнёраў у нашай краіне», – адзначыў прадстаўнік БУТБ.

Апроч магчымасці працы на рынку Рэспублікі Беларусь, таксама разгледжаны перспектывы рэалізацыі прадукцыі саратаўскіх вытворцаў у іншыя краіны шляхам здзяйснення транзітных здзелак. У бягучым годзе гэтым механізмам ужо скарысталіся каля 30 кампаній са Смаленскай, Маскоўскай, Ленінградскай і Бранскай абласцей. Праз B2B-пляцоўку БУТБ яны пастаўлялі ў Прыбалтыку, Польшчу і суседнія рэгіёны Расіі асвятляльнае абсталяванне, мэблю, тэкстыль, будматэрыялы і харчовыя тавары.