Дамоўленасць аб развіцці супрацоўніцтва ў сферы біржавога гандлю прадукцыяй сельскай гаспадаркі дасягнута па выніках анлайн-сустрэчы прадстаўнікоў Беларускай універсальнай таварнай біржы (БУТБ) з кіраўніцтвам Нові-Садскай таварнай біржы NSCOMEX (Сербія).

У ходзе перагавораў адбыўся абмен вопытам арганізацыі і правядзення таргоў прадукцыяй АПК, абмеркаваны механізмы забеспячэння выканання здзелак, якія прымяняюцца на абедзвюх біржах, і разгледжаны перспектыўныя напрамкі для ўзаемадзеяння. 

На думку дырэктара NSCOMEX Мілаша Яніча, у першую чаргу неабходна прапрацаваць пытанне ўзаемнага доступу на таргі сербскіх і беларускіх кампаній, што будзе садзейнічаць росту тавараабароту паміж нашымі краінамі. 

«Наша біржа спецыялізуецца на гандлі сельгаспрадукцыяй. У асноўным гэта кукуруза, пшаніца і соевыя бабы. Наколькі мне вядома, усе гэтыя таварныя пазіцыі прадстаўлены на беларускай біржавой пляцоўцы і карыстаюцца попытам у прадпрыемстваў Рэспублікі Беларусь. На мой погляд, менавіта на гэтым напрамку нам трэба засяродзіць намаганні. Пры гэтым галоўнае – забяспечыць бесперашкодны доступ беларускіх кампаній да нашай гандлёвай платформы, а сербскіх – да вашай. Такім чынам, у прадпрыемстваў аграпрамысловага комплексу Беларусі і Сербіі з'явіцца дадатковы інструмент для ажыццяўлення экспартна-імпартных аперацый, што, безумоўна, станоўча паўплывае на дынаміку двухбаковага тавараабароту», – адзначыў кіраўнік Нові-Садскай біржы.

У сувязі з гэтым начальнік упраўлення знешнеэканамічнай дзейнасці БУТБ Аляксандр Башлій выказаў высокую зацікаўленасць ва ўстанаўленні партнёрскіх адносін з NSCOMEX, у тым ліку з мэтай рэалізацыі сумесных праектаў на рэгіянальным узроўні. 

«Нам вельмі цікавыя краіны Балканскага паўвострава, і мы хацелі б узмацніць сваю прысутнасць у гэтым рэгіёне. Практыка паказала, што найбольш эфектыўным спосабам прасоўвання біржавых паслуг за мяжой з'яўляецца акрэдытацыя брокераў-нерэзідэнтаў, якія бяруць на сябе пытанні прыцягнення новых кампаній, а таксама, як правіла, садзейнічаюць з разлікамі і лагістыкай. Мне падаецца, што адзін з вашых брокераў мог бы стаць прадстаўніком БУТБ на Балканах. У сваю чаргу нейкі з нашых брокераў зарэгіструецца на вашай гандлёвай пляцоўцы і будзе прадстаўляць інтарэсы Нові-Садскай таварнай біржы ў рэгіёне Усходняй Еўропы. Лічу, што такі праект не толькі паспрыяе пашырэнню геаграфіі біржавога гандлю, але і развіццю нашых біржаў у цэлым», – упэўнены прадстаўнік БУТБ.