Беларуская універсальная таварная біржа (БУТБ) гатова аказаць садзейнічанне кампаніям з Ліпецкай вобласці Расійскай Федэрацыі па выхаду на рынак Рэспублікі Беларусь, забяспечыўшы прамы доступ да найбуйнейшых беларускіх прадпрыемстваў, якія працуюць у сферы дрэваапрацоўкі, прамысловасці, будаўніцтва і сельскай гаспадаркі. Гэтае пытанне, а таксама іншыя перспектыўныя напрамкі супрацоўніцтва абмяркоўваліся ў рамках візіту ў цэнтральны офіс БУТБ дэлегацыі дзелавых колаў Ліпецкай вобласці 29 красавіка 2021 г. Мерапрыемства арганізавана пры падтрымцы Беларускай гандлёва-прамысловай палаты і Цэнтра падтрымкі экспарту Ліпецкай вобласці.

Сярод іншага плануецца рэалізоўваць праз біржавую пляцоўку расійскую лесапрадукцыю, прычым не толькі для беларускіх спажыўцоў, але і ў трэція краіны.

«З-за імклівага развіцця дрэваапрацоўчай галіны попыт на драўняную сыравіну за апошні год істотна вырас, таму для павелічэння прапановы найбольш запатрабаваных пазіцый, такіх як піловачнік і балансавая драўніна, мы зацікаўлены ў прыходзе на біржу расійскіх пастаўшчыкоў. Дзякуючы праведзенай намі працы з лютага бягучага года лесанарыхтоўшчыкі з Бранскай, Пскоўскай і Смаленскай абласцей штотыдзень ўдзельнічаюць у таргах, і аб'ёмы продажаў пастаянна растуць. Характэрна, што ў структуры здзелак прысутнічаюць як пастаўкі дзелавой драўніны для патрэб беларускіх дрэваапрацоўшчыкаў, так і экспарт расійскіх піламатэрыялаў у Еўропу – так званыя «транзітныя здзелкі». Для нас гэта, безумоўна, перспектыўны кірунак, і мы яго актыўна прасоўваем», – адзначыў першы намеснік старшыні праўлення БУТБ Андрэй Новікаў падчас перамоваў з расійскімі бізнэсоўцамі.

Прадстаўнік БУТБ таксама падкрэсліў зацікаўленасць біржы ў прыцягненні на таргі расійскіх вытворцаў цукру і пабочных прадуктаў – бураковага жому і меласы. Па словах Андрэя Новікава, попыт на гэту прадукцыю значна перавышае прапанову.

«На жаль, беларускія вытворцы не могуць задаволіць усе заяўкі на куплю, якія паступаюць да нас ад буйных імпарцёраў з Кітая, Казахстана, Швейцарыі і іншых краін. Пры гэтым эфектыўнасць біржавога механізму аб'ектыўна высокая. Напрыклад, калі яшчэ паўгода таму па прамых кантрактах па-за біржай бураковы жом прадаваўся на экспарт у сярэднім па 100 EUR/т, то на апошняй біржавой гандлёвай сесіі – па 180 EUR/т. Так што мы гатовыя разгледзець любыя прапановы ад расійскіх пастаўшчыкоў гэтай прадукцыі, тым больш што Ліпецкая вобласць – адзін з лідэраў па вытворчасці цукру ў Расіі», – заявіў першы намеснік старшыні праўлення БУТБ.