Для ўдзелу ў таргах на Беларускай універсальнай таварнай біржы (БУТБ) акрэдытавана першая кампанія з Ісламскай Рэспублікі Пакістан – Sakafat Forever. Прыход пакістанскага гандлёвага прадпрыемства на біржавую пляцоўку стаў вынікам цеснага ўзаемадзеяння БУТБ і Пасольства Пакістана ў Рэспубліцы Беларусь, якое аказала садзейнічанне ў арганізацыі візіту на біржу дэлегацыі пакістанскіх дзелавых колаў у кастрычніку бягучага года. Мерапрыемства дазволіла пазнаёміць прадстаўнікоў пакістанскага бізнесу з магчымасцямі прымянення біржавога механізма ў трансгранічным гандлі і вызначыць найбольш ліквідныя беларускія і пакістанскія тавары для рэалізацыі праз БУТБ.

Паводле слоў кіраўніка Sakafat Forever г-на Слехрыі Маіза Ур Рэхмана, у якасці ўдзельніка таргоў яго кампанія мае намер працаваць у абодвух напрамках – на імпарт тавараў з Беларусі і на экспарт пакістанскай прадукцыі на беларускі рынак. Пры гэтым пакістанскі бізнесмен не выключае гандаль праз БУТБ з кампаніямі з іншых краін праз транзітныя здзелкі.

«Пачаць працу на беларускай біржы плануем з закупак піламатэрыялаў. У Пакістане прадукцыя дрэваапрацоўкі карыстаецца высокім попытам – асабліва ў сферы будаўніцтва, таму разлічваем наладзіць рэгулярныя пастаўкі ў нашу краіну беларускай дошкі. З гэтай мэтай у пачатку наступнага года ўпаўнаважаны прадстаўнік Sakafat Forever прыедзе ў Беларусь для знаёмства з вашымі вытворцамі, ацэнкі якасці пілапрадукцыі і абмеркавання пытанняў лагістыкі. Паралельна будзем прапрацоўваць магчымасць рэалізацыі ў Беларусі пакістанскага рысу і іншых тавараў сельскагаспадарчай групы. Для Пакістана гэта адзін з ключавых экспартных напрамкаў, і я ўпэўнены, што дзякуючы біржавому механізму мы зможам атрымаць доступ да максімальна шырокага кола пакупнікоў. Акрамя таго, хацелася б скарыстацца кліенцкай базай біржы для выхаду на рынак Еўрапейскага саюза. Але гэта праект на доўгатэрміновую перспектыву. У прыярытэце ўсё ж такі беларускія прадпрыемствы», – падкрэсліў кіраўнік пакістанскай кампаніі.

Зараз на БУТБ акрэдытаваны больш за 27,5 тыс. суб'ектаў гаспадарання з 69 краін свету. Па колькасці працуючых на біржы кампаній лідзіруюць Расія, Літва, Латвія, Польшча і Украіна, пры гэтым першае месца па дынаміцы росту новых удзельнікаў таргоў заняў Кітай.