Па выніках першых экспартных біржавых таргоў 2021 г., якія адбыліся на Беларускай універсальнай таварнай біржы (БУТБ), у Вялікабрытанію рэалізавана 1,6 млн штук гаспадарчых калоў на агульную суму 1,1 млн EUR. Раней гэта прадукцыя дрэваапрацоўкі пастаўлялася на брытанскі рынак у значна меншых аб'ёмах і пераважна праз пасярэднікаў.

«Да гэтага часу драўляныя калы ў асноўным пастаўляліся ў Вялікабрытанію апасродкавана – праз краіны Прыбалтыкі. У выніку беларускія экспарцёры гублялі істотную частку выручкі. Аднак у канцы мінулага года ў рамках мерапрыемстваў па пашырэнню геаграфіі продажаў лесапрадукцыі нам удалося прыцягнуць на біржавую пляцоўку шэраг буйных замежных кампаній, у тым ліку са Злучанага Каралеўства. Апошняя гандлёвая сесія наглядна прадэманстравала высокі экспартны патэнцыял беларускіх вырабаў з ацыліндраванай і акоранай драўніны. Напрыклад, па пастаўках у Вялікабрытанію мы ўжо пераўзышлі леташні паказчык. Таму ў бягучым годзе актыўная работа ў гэтым напрамку будзе працягвацца», – паведамілі ў прэс-службе БУТБ.

Даведачна.
У 2020 г. сума біржавых здзелак па экспарту вырабаў з ацыліндраванай і акоранай драўніны склала 4,2 млн EUR. Асноўнымі рынкамі збыту былі Германія, Латвія, Літва і Польшча.