Shimizu Lumberадзін з найбуйнейшых пастаўшчыкоў лесапрадукцыі на японскі рынак, мае намер закупляць піламатэрыялы на Беларускай універсальнай таварнай біржы (БУТБ). Кампанія ўжо завяршыла афармленне дакументаў, стаўшы першым акрэдытаваным на БУТБ рэзідэнтам Японіі. У выніку геаграфія біржавога гандлю пашырылася да 68 краін свету.

Shimizu Lumber займаецца нарыхтоўкай і перапрацоўкай драўніны, імпартам і экспартам пілапрадукцыі, вырабляе будматэрыялы і мэблю, а таксама аказвае транспартна-лагістычныя паслугі. Выхад на беларускі рынак кампанія разглядае як магчымасць дыверсіфікацыі крыніц паставак прадукцыі дрэваапрацоўкі – перш за ўсё абразных піламатэрыялаў іглічных парод, якія вельмі запатрабаваныя ў Японіі.

«Японія, як і многія іншыя дзяржавы, у поўнай меры адчула негатыўныя наступствы пандэміі каронавіруса, аднак цяпер эканоміка краіны актыўна аднаўляецца, у тым ліку і будаўнічы сектар. У сувязі з гэтым у цяперашні час попыт на піламатэрыялы знаходзіцца на высокім узроўні, а задавальняць яго прыходзіцца ў асноўным за кошт імпартнай прадукцыі, паколькі Японія не мае дастатковых уласных запасаў лясных рэсурсаў. Наша кампанія ўжо закупляе значныя аб'ёмы драўнянай сыравіны і піламатэрыялаў у краінах Паўднёва-Усходняй Азіі, Паўночнай Амерыкі і Еўропы. З Беларуссю мы раней не працавалі, але ўпэўнены, што ў нас атрымаецца наладзіць доўгатэрміновае плённае супрацоўніцтва з мясцовымі пастаўшчыкамі. У гэтым плане разлічваем на садзейнічанне і падтрымку з боку біржы», – адзначылі прадстаўнікі Shimizu Lumber. 

Shimizu Lumber Co., Ltd заснавана ў 1950 г. Асноўная сфера дзейнасці – вытворчасць і рэалізацыя піламатэрыялаў. Штаб-кватэра кампаніі размяшчаецца ў г. Кобе (востраў Хансю, Японія). Таксама маюцца прадстаўніцтва ў ЗША і Канадзе.