Больш 38 млн USD склала сума здзелак, заключаных у студзені-лістападзе беларускімі экспарцёрамі раслінных алеяў, бураковага жому і меласы на Беларускай універсальнай таварнай біржы (БУТБ).

У параўнанні з аналагічным перыядам мінулага года продажы гэтай прадукцыі за мяжу выраслі амаль у 3 разы і цяпер яны забяспечваюць 47% ад агульнага аб'ёму экспарту сельгаспрадукцыі праз БУТБ. Стратэгічныя рынкі збыту – краіны Прыбалтыкі і Заходняя Еўропа. У прыватнасці, у Літву рэалізаваны рапсавы алей і бураковы жом на суму 11,8 млн USD, што ў 4 разы перавышае паказчык 2019 г. У тройку найбуйнейшых пакупнікоў таксама ўвайшла Швейцарыя з сумай здзелак 9,5 млн USD і Эстонія з сумай здзелак 9 млн USD. Усяго ж беларуская прадукцыя перапрацоўкі сельскагаспадарчых культур экспартавалася ў 7 краін.

«Спрыяльная коштавая кан'юнктура і высокі попыт з боку замежных пакупнікоў аказваюць стымулюючае ўздзеянне на беларускіх вытворцаў. Напрыклад, яшчэ нядаўна бураковы жом гандляваўся па 118 еўра за тону, а на апошняй гандлёвай сесіі ўжо па 178 еўра. Устойлівы узыходзячы цэнавы трэнд характэрны і для рапсавага алею і меласы. Гэта досыць запатрабаваная прадукцыя ў Еўропе, і перадумоў для зніжэння ўзроўню цэн у бліжэйшай перспектыве няма», – адзначылі ў прэс-службе БУТБ.

У цэлым па выніках 11 месяцаў 2020 г. экспарт сельгаспрадукцыі праз БУТБ павялічыўся на 3%, да 80,5 млн USD. Акрамя раслінных алеяў і бураковага жому, у лік ключавых экспартных пазіцый ўвайшлі сухое малако, сметанковае масла і мука.