На Беларускай універсальнай таварнай біржы (БУТБ) здзейснены першыя транзітныя здзелкі па рэалізацыі сухога малака. Прадаўцамі і пакупнікамі выступілі расійскія кампаніі, якія для зніжэння камерцыйных рызык вырашылі скарыстацца беларускай біржавой пляцоўкай. У рамках названых здзелак рэалізавана 60 т сухога абястлушчанага малака на агульную суму 11,6 млн RUB (380 тыс. BYN).

«На пазабіржавым рынку заўсёды ёсць рызыка невыканання дагаворных абавязацельстваў адным з бакоў. На біржавой пляцоўцы такая магчымасць зведзена да мінімуму за кошт прымянення механізму біржавога задатку, разлікаў праз рахункі біржы, схемы «пастаўка супраць плацяжу» і іншых інструментаў кантролю за выкананнем здзелак. Таксама па асноўных сыравінных пазіцыях у нас ужо сфармаваўся пастаянны аб'ём попыту і прапановы. Таму замежныя кампаніі ўсё часцей здзяйсняюць так званыя транзітныя здзелкі, калі абодва контрагента – нерэзідэнты Рэспублікі Беларусь. З таварамі сельскагаспадарчай групы падобныя здзелкі раней не здзяйсняліся», – растлумачылі ў прэс-службе БУТБ.

У цэлым транзітныя біржавыя здзелкі ў бягучым годзе здзяйсняліся толькі ў секцыі прамысловых і спажывецкіх тавараў БУТБ. Па выніках 9 месяцаў іх колькасць дасягнула 64. Удзельнікамі здзелак былі пераважна суб'екты гаспадарання з Расійскай Федэрацыі і краін Прыбалтыкі.