На Беларускай універсальнай таварнай біржы (БУТБ) паспяхова пачаўся экспарт бураковага жому. Па выніках двух гандлёвых сесій рэалізавана 2,5 тыс. т гэтай прадукцыі на агульную суму 320 тыс. EUR. Прадаўцамі выступілі айчынныя цукровыя заводы, а пакупнікамі – кампаніі з Літвы, Нідэрландаў, Украіны і Эстоніі.

Асноўныя спажыўцы бураковага жому – жывёлагадоўчыя фермы, дзе ён выкарыстоўваецца для адкорму жывёлы. З'яўляючыся пабочным прадуктам перапрацоўкі цукровых буракоў, па пажыўнай каштоўнасці бураковы жом пераўзыходзіць сена і толькі крыху саступае аўсу.

Зыходзячы з вынікаў таргоў, прагназуецца далейшы рост попыту на беларускую прадукцыю за мяжой.

«Па сваім кошце і якасці беларускі бураковы жом дастаткова канкурэнтаздольны, і, як паказалі біржавыя таргі, нават трохі недаацэнены. У ходзе апошняй гандлёвай сесіі пачатковая цана лота вырасла на 5%. Разлічваем, што паспяховы старт таргоў паслужыць сігналам да дзеяння для іншых удзельнікаў рынку, і яны таксама выйдуць на біржавую пляцоўку. Біржа са свайго боку прыкладзе ўсе неабходныя намаганні для прыцягнення на таргі замежных кампаній», – адзначылі ў прэс-службе БУТБ.

Арганізацыя экспартных біржавых таргоў цукрам і бураковым жомам стала практычнай рэалізацыяй дамоўленасцей аб супрацоўніцтве, дасягнутых паміж кіраўніцтвам БУТБ і канцэрна «Белдзяржхарчпрам». Галоўная мэта – павышэнне эфектыўнасці і пашырэнне геаграфіі экспарту прадукцыі, якая выпускаецца прадпрыемствамі канцэрна.