Больш за 4 тыс. т сырога каровінага малака на суму 3,9 млн BYN рэалізавана па выніках апошніх таргоў, якія прайшлі на Беларускай універсальнай таварнай біржы (БУТБ). У гандлёвай сесіі прынялі ўдзел 8 прадаўцоў і 21 пакупнік.

Усяго з пачатку года на БУТБ рэалізавана 92,3 тыс. т сырога малака на суму 86,9 млн BYN. Для параўнання за ўвесь мінулы год было прададзена толькі 14,6 тыс. т гэтай прадукцыі на 13,6 млн BYN. Высокія паказчыкі продажаў аналітыкі БУТБ звязваюць з «сталеннем» гэтага сегмента таварнага рынку, які паспяхова прайшоў этап станаўлення і на сённяшні дзень забяспечвае значную долю ў біржавым тавараабароце сельгаспрадукцыі.

«За студзень-верасень аб'ём рэалізацыі сельгаспрадукцыі праз біржавую пляцоўку вырас на 5% і склаў 700 млн BYN. Больш за 11% ад гэтай сумы забяспечылі продажы сырога каровінага малака, якое разам з кармавымі дадаткамі і шротам алейных ўвайшло ў тройку самых запатрабаваных тавараў сельскагаспадарчай групы. Гэта сведчыць аб тым, што біржавы рынак сырога малака ўжо цалкам сфармаваўся і дынамічна развіваецца», – паведамілі ў прэс-службе БУТБ.

Пры гэтым актыўна пашыраецца кола пастаўшчыкоў малочнай сыравіны. Так, калі ў мінулым годзе іх было не больш за 10, то цяпер у біржавых таргах рэгулярна ўдзельнічаюць каля 20 малакавытворцаў з розных рэгіёнаў рэспублікі.

«Магчымасць рэалізаваць сыравіну па больш высокай цане, чым на пазабіржавым рынку, спрыяе прыходу на біржавую пляцоўку новых гульцоў. Да таго ж, беручы ўдзел у таргах, сельгаспрадпрыемствы не нясуць практычна ніякіх выдаткаў, паколькі акрэдытацыя на біржы бясплатная, а біржавы збор складае ўсяго 10 капеек за здзелку», – адзначылі на БУТБ.