На Беларускай універсальнай таварнай біржы (БУТБ) здзейснены першыя здзелкі па закупцы медыцынскіх масак беларускай вытворчасці. У якасці прадаўцоў выступілі прадпрыемствы канцэрна «Беллегпрам», з якім у БУТБ маюцца дамоўленасці аб супрацоўніцтве. Па выніках гандлёвай сесіі прададзена 8 тыс. масак. Усяго ж за мінулыя два тыдні на біржавых таргах рэалізавана больш за 160 тыс. адзінак гэтай прадукцыі.

Як паведаміў начальнік упраўлення таргоў прамысловымі і спажывецкімі таварамі БУТБ Антон Зарэцкі, попыт на медыцынскія маскі і іншыя сродкі аховы ў апошні час прыкметна вырас.

«Не сакрэт, што ў гэтым годзе ў сувязі з пандэміяй рынак сродкаў індывідуальнай аховы вырас у разы. Для задавальнення ўнутранага попыту шэраг прадпрыемстваў канцэрна «Беллегпрам» аператыўна пераарыентаваліся на выпуск гэтай прадукцыі. Для іх біржа гатова забяспечыць эфектыўны канал збыту, і ўжо першыя таргі гэта наглядна прадэманстравалі. У святле павышанага попыту на сродкі індывідуальнай аховы лічу гэты кірунак вельмі перспектыўным», – заявіў прадстаўнік БУТБ.

Ён таксама адзначыў, што ў рамках дамоўленасцей з канцэрнам «Беллегпрам» плануецца паступова пашыраць асартымент тавараў, якія выстаўляюцца на таргі падведамнымі яму прадпрыемствамі.

«Размяшчаючы заяўку на продаж у гандлёвай сістэме біржы, прадпрыемства, па сутнасці, бясплатна рэкламуе сваю прадукцыю. Бо ўваход на біржавы таварны рынак для суб'ектаў гаспадарання сёння бясплатны, а сярод акрэдытаваных у нас 24 тысяч кампаній напэўна знойдуцца патэнцыйныя пакупнікі. Таму чым больш заявак будзе паступаць ад беларускіх прадпрыемстваў, тым вышэй верагоднасць аператыўна знайсці дзелавых партнёраў, у тым ліку за мяжой», – падкрэсліў Антон Зарэцкі.

Даведачна.
Секцыя прамысловых і спажывецкіх тавараў працуе
з 2009 г. У адрозненне ад іншых гандлёвых секцый БУТБ тут рэалізуецца шырокая наменклатура гатовай прадукцыі, а таргі праводзяцца ў кругласутачным рэжыме па меры паступлення заявак на куплю і продаж. За 9 месяцаў 2020 г. тавараабарот секцыі склаў 319 млн BYN, у тым ліку экспарт – 33 млн BYN.