Больш чым у 10 разоў, да 2 млн USD, вырасла сума здзелак на куплю, заключаных кампаніямі з Кітая на Беларускай універсальнай таварнай біржы (БУТБ) у студзені-верасні 2020 г. У таварнай структуры пераважалі драўляныя нарыхтоўкі і абрэзныя піламатэрыялы хвойных парод.

Як адзначылі ў прэс-службе БУТБ, ўсплёск цікавасці да біржавых таргоў з боку кітайскага бізнесу абумоўлены не толькі спрыяльнай цэнавай кан'юнктурай, але і зручнай лагістыкай, якую змаглі прапанаваць беларускія экспарцёры. У прыватнасці, з гэтага года з'явілася магчымасць купляць пілапрадукцыю на розных базісах пастаўкі (многабазісныя лоты), што дазволіла кітайскім кампаніямі самім выбіраць найбольш прыдатны для іх пункт прыёмкі тавару. Акрамя таго, істотна скараціліся тэрміны дастаўкі за кошт прымянення чыгуначнага транспарту ў рамках ініцыятывы кітайскага ўрада «Адзін пояс, адзін шлях».

«У далейшым для павышэння прывабнасці біржавой пляцоўкі разглядаецца магчымасць увядзення асобнай гандлёвай сесіі па рэалізацыі лесапрадукцыі на кітайскі рынак. Усе лоты, выстаўленыя на гэтыя таргі, будуць максімальна адаптаваны пад кітайскіх спажыўцоў, а за кошт высокай канцэнтрацыі пакупнікоў будзе забяспечвацца неабходны ўзровень канкурэнцыі», – паведамілі ў прэс-службе біржы.

Акрамя Кітая, высокія тэмпы росту закупак беларускай прадукцыі былі характэрныя для ЗША – у 2,6 разы, Швейцарыі – у 2 разы, Бельгіі – на 84%, Іспаніі – на 24% і Нідэрландаў – на 17%.

Разам з тым лідэрам па суме імпартных здзелак па-ранейшаму застаецца Літва. За 9 месяцаў бягучага года на гэты рынак рэалізаваны тавары на агульную суму 87,4 млн USD, што на 3% больш, чым за той жа перыяд 2019 г. Найбольшай папулярнасцю ў літоўскіх пакупнікоў карысталіся піламатэрыялы, дранка, рапсавы алей, казеін і цэмент.