З пачатку года на экспартных таргах Беларускай універсальнай таварнай біржы (БУТБ) рэалізавана прадукцыя чорнай і каляровай металургіі на суму 27 млн BYN. Гэта на 33% больш, чым за аналагічны перыяд мінулага года.

Асноўны аб'ём здзелак прыйшоўся на чорныя і каляровыя металы, а таксама іх лом i адходы. За першае паўгоддзе кампаніі з Германіі, Канады, Латвіі, Літвы, Польшчы, Расіі і Украіны закупілі дадзенай прадукцыі на 24 млн BYN, перавысіўшы паказчык 2019 г. на 20%.

Акрамя таго, актыўна развіваўся сумесны праект БУТБ і Беларускага металургічнага завода (БМЗ). За справаздачны перыяд на рынак Польшчы рэалізаваны арматурны пракат на суму каля 3 млн BYN.

Як паведаміў начальнік упраўлення таргоў металапрадукцыяй БУТБ Яўген Бурэйка, у планах біржы на бліжэйшую пяцігодку істотна нарасціць долю экспарту ў структуры здзелак з металапрадукцыяй.

«Зараз экспарт займае толькі 5% у абароце секцыі металапрадукцыі. Астатні аб'ём забяспечваецца за кошт імпарту і транзакцый на ўнутраным рынку. Такая сітуацыя склалася з прычыны таго, што доўгі час біржавая пляцоўка пазіцыянавалася перш за ўсё як закупачны інструмент. Аднак з канца мінулага года мы ўзялі курс на развіццё экспартнага напрамку, і «першай ластаўкай» стаў наш сумесны праект з БМЗ па дыверсіфікацыі экспарту беларускай арматуры. У далейшым плануем пашыраць таварную наменклатуру і асвойваць новыя перспектыўныя рынкі, каб на працягу наступных пяці гадоў давесці долю экспартных здзелак як мінімум да 20%», – заявіў прадстаўнік БУТБ.