15 снежня 2020 г. першы намеснік старшыні праўлення Беларускай універсальнай таварнай біржы (БУТБ) Андрэй Новікаў прыняў удзел у круглым стале «Развіццё біржавога электроннага гандлю ў перыяд пандэміі COVID-19: праблемы і перспектывы», які адбыўся на базе прэс-цэнтра БелТА. У якасці экспертаў на мерапрыемства былі запрошаны: загадчык кафедры дзяржаўнай эканамічнай палітыкі Акадэміі кіравання пры Прэзідэнце Рэспублікі Беларусь Уладзіслаў Шчэпаў і прадстаўнікі Навукова-даследчага эканамічнага інстытута Міністэрства эканомікі Рэспублікі Беларусь – загадчыца аддзела развіцця сферы паслуг Алена Валанцэвіч і загадчыца аддзела рэгулявання і прагназавання знешняга гандлю і плацёжнага балансу Ірына Целеш.

У рамках круглага стала абмеркаваны вынікі дзейнасці БУТБ у 2020 г., асноўныя тэндэнцыі, якія склаліся на біржавым таварным рынку, найбольш значныя праекты ў сферы біржавога гандлю, а таксама і планы развіцця біржавой пляцоўкі на бліжэйшыя 5 гадоў. На думку ўдзельнікаў мерапрыемства, адным з ключавых трэндаў 2020 г. з'яўляецца беспрэцэдэнтны рост папулярнасці электронных гандлёвых пляцовак, онлайн-інструментаў і сэрвісаў. Гэта не толькі паспрыяла прыходу на БУТБ новых кампаній, але і паслужыла стымулам для павелічэння аб'ёмаў здзелак, якія заключаюць ужо працуючыя на біржы арганізацыі. Так, з пачатку года на біржавой пляцоўцы акрэдытавалася больш за 2,2 тыс. новых удзельнікаў, а таваразварот БУТБ па выніках 11 месяцаў дасягнуў 4,7 млрд BYN, што на 12%, чым студзені-лістападзе 2019 г.

Асаблівая ўвага ў ходзе дыскусіі была ўдзелена перспектывам больш шырокага прымянення біржавога механізму пры рэалізацыі высокаліквідных сыравінных і несыравінных тавараў, а таксама раскрыццю патэнцыялу БУТБ у сферы гандлю паслугамі, у тым ліку на экспарт.