Да канца года Беларуская універсальная таварная біржа (БУТБ) плануе прыступіць да распрацоўкі новай гандлёвай сістэмы, якая істотна спросціць удзел у біржавых таргах, у тым ліку для замежных кампаній. Ключавымі новаўвядзеннямі стануць модульная архітэктура, адзіны вэб-інтэрфейс і мультымоўнасць.

Паводле слоў першага намесніка старшыні праўлення БУТБ Андрэя Новікава, мадэрнізаваная гандлёвая сістэма будзе не толькі больш гнуткай, зручнай і маштабуемай, але і дазволіць пашырыць геаграфію біржавога гандлю.

«Цяпер для ўдзелу ў біржавых таргах металапрадукцыяй, лесаматэрыяламі і сельгаставарамі нашым кліентам даводзіцца ўсталёўваць дадатковае праграмнае забеспячэнне і рэгулярна абнаўляць яго па меры выхаду наступных версій. У новай гандлёвай сістэме гэты недахоп будзе ліквідаваны. Замест асобных праграмных модуляў плануецца рэалізаваць адзіны вэб-інтэрфейс, які працуе па прынцыпе «аднаго акна. Гэта значыць, што для ўваходу ў таргі будзе патрэбен толькі браўзэр і доступ у Інтэрнэт. Пры гэтым узаемадзейнічаць з гандлёвай сістэмай карыстач зможа на сваёй роднай мове – англійскай, польскай, нямецкай, кітайскай ці арабскай. Чакаем, што гэта зробіць біржавую пляцоўку больш прывабнай для кампаній-нерэзідэнтаў, якія хацелі б выкарыстоўваць біржавы механізм для працы на беларускім рынку», – паведаміў Андрэй Новікаў.

Стварэнне новай гандлёвай сістэмы прадугледжана стратэгіяй развіцця БУТБ да 2025 г. і з'яўляецца часткай комплексу мерапрыемстваў, накіраваных на далейшую аўтаматызацыю біржавых бізнес-працэсаў і павышэнне ўзроўню кліенцкага сэрвісу.