Перспектывы экспарту беларускай прадукцыі ў Сербію і іншыя краіны Балканскага рэгіёну сталі галоўнай тэмай перамоваў паміж кіраўніцтвам Беларускай універсальнай таварнай біржы (БУТБ) і ТАА «Балкан Бай», створаным пры ўдзеле холдынгу «БК-Груп» (Сербія).

Бакі абмеркавалі магчымасці выкарыстання біржавой пляцоўкі для нарошчвання ўзаемнага тавараабароту Беларусі і Сербіі, а таксама вызначылі найбольш ліквідныя беларускія і сербскія тавары, гандаль якімі мэтазгодна арганізаваць праз БУТБ.

«Прасоўванне беларускіх тавараў на знешнія рынкі – адна з прыярытэтных задач біржы. Таму, безумоўна, мы зацікаўлены ў больш шырокім ужыванні біржавога механізму ў гандлі паміж нашымі краінамі. І калі ваша кампанія зможа прыцягнуць на біржавую пляцоўку прадстаўнікоў сербскага бізнэсу, мы гатовы аказаць ім неабходнае садзейнічанне ў рабоце на беларускім рынку», – заявіў старшыня праўлення БУТБ Аляксандр Асмалоўскі.

У сувязі з гэтым дырэктар ТАА «Балкан Бай» Канстанцін Пронькін паведаміў, што ў кампанію рэгулярна звяртаюцца прадпрыемствы з Сербіі, Славакіі і Румыніі, якія жадаюць прадаваць або купляць што-небудзь у Беларусі. На яго думку, гэта вельмі перспектыўны кірунак супрацоўніцтва.

«Стаўшы біржавым брокерам, мы маглі б перанакіраваць увесь гэты паток заявак на біржавую пляцоўку. Пры гэтым мы не хочам абмяжоўвацца толькі Балканскім паўвостравам. Напрыклад, у нас напрацавана сетка дзелавых кантактаў у краінах Паўночнай Афрыкі, а гэта досыць ёмісты рынак збыту для беларускіх лесаматэрыялаў і іншай прадукцыі. Лічу, што гэта добрая магчымасць пашырыць геаграфію біржавога гандлю», – адзначыў Канстанцін Пронькін.