Беларускія вытворцы цукру пацвердзілі гатоўнасць па максімуму выкарыстоўваць гандлёвую пляцоўку Беларускай універсальнай таварнай біржы (БУТБ) пры экспарце бураковага жому і меласы. Адпаведная дамоўленасць дасягнута 8 кастрычніка 2020 г. па выніках сустрэчы кіраўніцтва БУТБ з прадстаўнікамі канцэрна «Белдзяржхарчпрам», ААТ «Гарадзейскі цукровы камбінат» і ААТ «Слуцкі цукрарафінадны камбінат».

Экспартныя біржавыя таргі бураковым жомам праводзяцца на БУТБ з верасня бягучага года. За няпоўны месяц на знешні рынак рэалізавана 7 тыс. т гэтай прадукцыі на агульную суму звыш 1 млн EUR. У якасці пакупнікоў выступалі кампаніі з Латвіі, Літвы, Нідэрландаў і Эстоніі.

«Эканамічны эфект ад прымянення біржавога механізму можа налічваць мільёны еўра. Ужо першыя гандлёвыя сесіі паказалі, што попыт на бураковы жом ёсць, а канкурэнцыя сярод пакупнікоў спрыяе росту біржавых каціровак. У параўнанні з вераснем, калі мы толькі пачалі развіваць гэты напрамак, экспартныя цэны павялічыліся амаль на 25%. І гэта яшчэ не ліміт», – лічыць першы намеснік старшыні праўлення БУТБ Андрэй Новікаў.

У гэтай сувязі прадстаўнікі прадпрыемстваў цукровай галіны выказалі зацікаўленасць у павелічэнні долі экспарту жому і меласы праз БУТБ аж да 100%. Па іх словах, калі біржа зможа прыцягнуць на таргі неабходную колькасць пакупнікоў і забяспечыць высокі ўзровень канкурэнцыі, яны гатовыя выкарыстоўваць біржавую пляцоўку як асноўны канал збыту.