21 лютага ва ўсім свеце адзначаўся Міжнародны дзень роднай мовы — штогадовае свята, заснаванае ў 1999 г. рашэннем 30-й Генеральнай сесіі ЮНЕСКА.

У Беларусі Дні роднай мовы праводзяцца з 2009 г., і ў гэтым годзе да святкавання ўпершыню далучылася Беларуская ўніверсальная таварная біржа (БУТБ).

У цэнтральным офісе біржы былі зладжаны некалькі экспазіцый з найбольш вядомымі і каларытнымі нацыяныльнымі сімваламі і прадметамі побыту беларусаў. Пры падтрымцы Цэнтра беларускіх народных рамёстваў «Скарбніца» была арганізавана міні-выстава сапраўднай беларускай раскошы і нацыянальнай каштоўнасці — слуцкіх паясоў, дзе расказвалася пра гісторыю і асаблівасці іх стварэння.

Акарамя таго, усіх супрацоўнікаў сустракалі дзяўчаты ў прыгожых нацыянальных строях, частавалі беларускімі прысмакамі і традыцыйным духмяным хлебам з жытняй мукі, а таксама прапанавалі напісаць свае любімыя беларускія словы. У выніку месца на падрыхтаваных дошках хутка скончылася, а слоў яшчэ засталося вельмі шмат. Гэта дапамагло працягнуць святкаванне ўжо ў інтэрактыўным рэжыме — праверыць свае веды ў адмысловым тэсце на валоданне беларускай мовай.

У тэст увайшлі 70 пытанняў, не самых простых, але супрацоўнікі БУТБ прадэманстравалі даволі высокі ўзровень ведаў. Паступіла 77 адказаў, а сярэдні бал дасягнуў 76% (53/70).

Найлепшыя ж вынікі паказалі:

3-е месца: 96% (67/70) — Віталь Дамнянкоў, вядучы спецыяліст упраўлення таргоў лесапрадукцыяй;

2-е месца: 97% (68/70) — Аляксандра Крэнт, вядучы юрысконсульт біржы;

1-е месца: 100% (70/70) — Карына Гур’ян, спецыяліст упраўлення суправаджэння біржавых здзелак.

Напрыканцы Дня роднай мовы калектывам біржы было прынята агульнае рашэнне далучыцца да свята і ў наступным годзе, таму што такія мерапрыемствы дапамагаюць усім не забывацца на свае карані і яшчэ больш плённа працаваць на карысць роднай краіны.